বিশ্বনাথত ৰাস মহোৎসৱৰ সূচনা – জুবিন গাৰ্গৰ নামত উৎসৰ্গা সকলো কাৰ্যসূচী
উত্তৰ অসমৰ সৰ্ববৃহৎ ৰাস মহোৎসৱ হিচাপে পৰিচিত বিশ্বনাথ ৰাস মহোৎসৱত আজিৰে পৰা আৰম্ভ হ’ল পবিত্ৰ কাৰ্যসূচীৰ প্ৰাৰম্ভ। লক্ষ্মী পূৰ্ণিমাৰ শুভক্ষণত অনুষ্ঠিত হয় ৰাসৰ পৱিত্ৰ লাইখুঁটা স্থাপন অনুষ্ঠান, যাৰ জৰিয়তে আনুষ্ঠানিকভাৱে সূচনা কৰা হয় মহোৎসৱৰ আয়োজনৰ।
এইবাৰৰ ৰাস মহোৎসৱৰ বিশেষত্ব হ’ল — সমগ্ৰ কাৰ্যসূচী প্ৰাণৰ শিল্পী জুবিন গাৰ্গৰ নামত উৎসৰ্গা কৰা হৈছে। উত্তৰ চাৰিআলি সাৰ্বজনীন ৰাস মহোৎসৱ সমিতিয়ে এই ঘোষণা কৰি কয়, জুবিন গাৰ্গ বিহীন বিশ্বনাথৰ ৰাস মহোৎসৱ এক "উকা বৃন্দাবন"।
সভাপতি নিৰঞ্জন হাজৰিকাই সংবাদ মেলত কয় — "জুবিন দা দুবাৰকৈ আমাৰ ৰাসৰ মুখ্য অতিথি আছিল, তেওঁ বিশ্বনাথৰ ৰাসৰ সৈতে গভীৰভাৱে জড়িত। তেওঁৰ নামত এইবাৰ ৰাস মহোৎসৱৰ সকলো কাৰ্যসূচী উৎসৰ্গা কৰাটো আমাৰ সন্মান আৰু সোঁৱৰণ।"
বিশ্বনাথ ৰাস মহোৎসৱ অহা ৩, ৪ আৰু ৫ নবেম্বৰত অনুষ্ঠিত হ’ব। প্ৰতিদিনৰ কাৰ্যসূচী “মায়াবিনী ৰাতিৰ বুকুত” শীৰ্ষক জুবিন গাৰ্গৰ গীতৰে শুভাৰম্ভ কৰা হ’ব। এই গীতটি প্ৰায় ৫ সহস্ৰাধিক অনুৰাগীয়ে একেলগে পৰিৱেশন কৰিব বুলি জানিব পৰা গৈছে।
তদুপৰি, জুবিন গাৰ্গৰ শ্ৰদ্ধাঞ্জলি অনুষ্ঠানৰ শুভাৰম্ভ হ’ব “বেহুৰ ভিতৰে বীৰ অভিমন্যু” শীৰ্ষক দিহানামৰে, য’ত দুই শতাধিক আই-মাতৃ অংশ ল’ব। ৰাস বাকৰিত অনুষ্ঠিত হ’ব জুবিন গাৰ্গৰ স্মৃতিৰ ভিডিঅ’ প্ৰদৰ্শন, তেওঁৰ সহচৰ্য লাভ কৰাসকলৰ সৈতে আলোচনা, আৰু জুবিনৰ গীতৰে শ্ৰদ্ধা নিবেদন। লগতে অনুষ্ঠিত হ’ব গছপুলি বিতৰণ আৰু ৰোপণ কাৰ্যসূচী, যাৰ জৰিয়তে পৰিৱেশ-সচেতনতাও প্ৰচাৰ কৰা হ’ব।
আনহাতে, ৰাস মহোৎসৱ সমিতিয়ে ঘোষণা কৰিছে “বিশ্বনাথ ৰাস মহোৎসৱৰ বৃন্দাবনত জুবিন গাৰ্গ” শীৰ্ষক ব্যতিক্ৰমী অনুষ্ঠানৰ। জুবিন গাৰ্গৰ আত্মাৰ শান্তিৰ প্ৰাৰ্থনাৰে ৫০০০ বন্তি প্ৰজ্বলনৰো আয়োজন কৰা হ’ব।
আজি অনুষ্ঠিত লাইখুঁটা স্থাপন অনুষ্ঠানটোত খোল-তালৰ ধ্বনি, শ্ৰীমন্ত শংকৰ-মাধৱ গুৰু বন্দনা আৰু ভগৱান শ্ৰীকৃষ্ণ স্তুতিৰে ৰাস ক্ষেত্ৰত এক আধ্যাত্মিক পৰিবেশ সৃষ্টি হয়। সভাপতি নিৰঞ্জন হাজৰিকাই উপস্থিত ভক্তসকলক আহ্বান জনায় ৰাস মহোৎসৱৰ সাফল্য নিশ্চিত কৰিবলৈ সক্ৰিয়ভাৱে অংশ ল’বলৈ।
অনুষ্ঠানটো পৰিচালনা কৰে সাধাৰণ সম্পাদক গৌতম দাধৰাই, যি গছপুলি বিতৰণৰ উদ্যোগও লয়।
এই শুভক্ষণত উপস্থিত থাকে ৰাস মহোৎসৱৰ কাৰ্যকৰী সভাপতি বসন্ত বৰা, বিশ্বনাথ আঞ্চলিক পঞ্চায়তৰ সভাপতি কন্দৰ্প হাজৰিকা, বিশ্বনাথ চাৰিআলি প্ৰেছ ক্লাৱৰ সভাপতি পুলক হাজৰিকা, উপ সভাপতি জাগতাৰ সিং, সম্পাদক আমিৰ খান, উপদেষ্টা ৰতন ভূঞা, হেমন্ত শইকীয়া, ত্ৰিবেণী বৰা, বিক্ৰম বিকাশ বৰা, বুল ভূঞা, পার্থজিত বৰুৱা, ৰঞ্জিত দাস, কামেশ্বৰ দাস, সৌৰৱজ্যতি বৰা আদিকে।
অহা ৪ আৰু ৫ নবেম্বৰত অনুষ্ঠিত হ’ব “শ্ৰীকৃষ্ণৰ শিশুলীলা” আৰু “কেলিগোপাল নাট”ৰ মনোৰম প্ৰদৰ্শন, যাৰ জৰিয়তে ৰাস মহোৎসৱত আধ্যাত্মিকতা আৰু সংস্কৃতিৰ এক অপূৰ্ব মিলন ঘটিব।
📍 বিশ্বনাথ ৰাস মহোৎসৱ ২০২৫ — জুবিন গাৰ্গৰ নামত উৎসৰ্গিত এক স্মৰণীয় আয়োজনেৰে আগবঢ়িছে উত্তৰ অসমৰ সংস্কৃতিক উৎসৱ।
