গোৱাত নাইটক্লাবত ভয়ংকৰ অগ্নিকাণ্ড : চিলিণ্ডাৰ বিস্ফোৰণত ২৩ জনৰ মৃত্যু, তিনিগৰাকী পৰ্যটকো অন্তৰ্ভুক্ত
পৰ্টাৰগঞ্জ (অৰপোৰা), গোৱা | ৭ ডিচেম্বৰ ২০২৫
গোৱাৰ উত্তৰ গোৱা জিলাৰ অৰপোৰা গাঁৱৰ এখন জনপ্ৰিয় নাইটক্লাবত শনিবাৰে নিশাৰ পৰা পুৱালৈ চলা এক ভয়াৱহ অগ্নিকাণ্ডত অন্ততঃ ২৩ জন লোকৰ মৃত্যু হৈছে। নিহতসকলৰ ভিতৰত ক্লাবৰ বেছিভাগ কৰ্মচাৰীৰ লগতে তিনিগৰাকী মহিলা আৰু তিনিৰ পৰা চাৰিজন পৰ্যটক আছে বুলি জানিব পৰা গৈছে।প্ৰত্যক্ষদৰ্শী আৰু প্ৰাৰম্ভিক তদন্তৰ ভিত্তিত জনা গৈছে যে, ক্লাবৰ পাকঘৰত থকা গেছ চিলিণ্ডাৰ বিস্ফোৰণৰ ফলতেই জুইৰ সূত্ৰপাত হয়। বিস্ফোৰণৰ পিছতে জুই অতি কম সময়ৰ ভিতৰতে সমগ্ৰ ক্লাবতে বিয়পি পৰে আৰু ঘন ধোঁৱাৰ বাবে শ্বাসৰুদ্ধ হৈয়ে বেছিভাগ লোকৰ মৃত্যু হয়। মুখ্যমন্ত্ৰী প্ৰমোদ সাৱন্তে ঘটনাস্থলীত উপস্থিত হৈ সাংবাদিকক জনোৱা মতে, “মাত্ৰ তিনিজন লোক জ্বলি মৃত্যুমুখত পৰিছে, বাকীসকলৰ মৃত্যু হৈছে ধোঁৱাৰ ফলত শ্বাসৰোধ হৈ।”গোৱা আৰক্ষীৰ ডি জি পি আলোক কুমাৰে প্ৰেছ ব্ৰিফিঙত কয়, “এতিয়ালৈকে ২৩খন মৃতদেহ উদ্ধাৰ কৰা হৈছে। বেছিভাগ মৃতদেহ পাকঘৰৰ পৰাই উদ্ধাৰ হোৱা বাবে প্ৰাৰম্ভিকভাৱে চিলিণ্ডাৰ বিস্ফোৰণকেই মূল কাৰণ বুলি ধৰি লোৱা হৈছে। ফৰেনচিক দল আৰু অগ্নিনিৰ্বাপক বিভাগৰ বিশেষজ্ঞই যুটীয়াভাৱে তদন্ত কৰি আছে।”ঘটনাটো পুৱা প্ৰায় ১২ বজাত আৰম্ভ হয় বুলি স্থানীয় লোকে জানিবলৈ দিয়ে। কেইবাখনো অগ্নিনিৰ্বাপক বাহিনীৰ গাড়ী ততালিকে ঘটনাস্থলীত উপস্থিত হৈ প্ৰায় দুঘণ্টাৰ অবিৰাম প্ৰয়াসৰ পিছত জুই নিয়ন্ত্ৰণলৈ আনে। কিন্তু তেতিয়ালৈকে বহু লোক ধোঁৱাৰ মাজত আবদ্ধ হৈ পৰিছিল। যিসকল অতিথি আৰু কৰ্মচাৰী সময়মতে ওলাই আহিবলৈ সক্ষম হৈছিল, তেওঁলোকেই প্ৰথমতে আৰক্ষী আৰু অগ্নিনিৰ্বাপক বাহিনীক খবৰ দিয়ে।মুখ্যমন্ত্ৰী প্ৰমোদ সাৱন্তে ঘটনাস্থলীত উপস্থিত হৈ পৰিস্থিতিৰ খোজ-খবৰ লয় আৰু নিহতসকলৰ পৰিয়ালৰ প্ৰতি গভীৰ সহানুভূতি জ্ঞাপন কৰে। তেওঁ ঘোষণা কৰে যে, “এই দুৰ্ঘটনাৰ পুংখানুপুংখ তদন্ত কৰা হ’ব আৰু নিয়ম ভংগ কৰা যিকোনো ব্যক্তি বা প্ৰতিষ্ঠানৰ বিৰুদ্ধে আইনানুগ কঠোৰ ব্যৱস্থা গ্ৰহণ কৰা হ’ব।”উদ্ধাৰ অভিযান এতিয়াও চলি আছে আৰু আহত কেইজনমানক গোৱা মেডিকেল কলেজ হস্পিতালত ভৰ্তি কৰা হৈছে। নিহতসকলৰ পৰিচয় নিৰূপণৰ কাম চলি আছে। গোৱাৰ পৰ্যটন ঋতুৰ মাজতে সংঘটিত এই দুৰ্ঘটনাই ৰাজ্যৰ নাইটলাইফৰ নিৰাপত্তা ব্যৱস্থাৰ ওপৰত গুৰুতৰ প্ৰশ্ন উত্থাপন কৰিছে।
